Ḍu.... kerrong arèya nyèksa ka abâ’....!!

 Serial Puisi Madura (Bagian VI)

Ḍu.... kerrong arèya nyèksa ka abâ’....!!
(Sè ngangghit : Ajeng Vienyard)

Bulâ ajhumbu’i ebbhun bângennan, bân bulâ matalabuyaghi
Bulâ torodhi taghibâ angèn jhâu ngarbâng
Sopajâ taanga’aghi bi’ sang mataarè lagghu
Sè cè’ saccana akancaè bulâ ḍâlem seppè
Makko bulâ tao jhâ’ seppè ghânèka bânnè kasèppèan

Bulâ alèmbâyaghi tèngka’, asalo’so’è lampat sè tadhingghâl
Akadhi bâkto bulâ so dhika ghi’ apolong, bâkto ghânèka, ḍu Kaka’..
Anapè sanèyap bulâ paksa kaangghuy ngèjhâ, andhâddhiaghi sèksa
Sanajjhân peddhi, peddhi bân lessoh.. bulâ pagghun arangka’
Sopajâ ta’ ghâgghâr abhuḍhâk celloddhâ bângennan sè tapongkor

Saompama ebbhun rowa bi’ bulâ kennèng èpadhâddhi ghâmbârrâ robâna dhika
Mè’ pola bhâi kerrong ta’ aserroa saseḍḍhi rèya è atè bulâ
Acerrèng ra! sè lantè, sopajâ sowarana dhika takèḍing palasdhâ
Sopajâ bulâ bisa nemmo lampat padhâna dhika, ḍu Kaka’..
Bân bulâ asè’èraghiâ bhâb pajhâlânanna tarèsna dhika bân bulâ

Mon ḍâgghi’ sè’-rèsè’na ojhân pon la ambu, bulâ terro ngajhâgghâ dhika
Arassaè ḍâng-anḍâng sè alap-kellèp è bâng-abâng
Kalabân bârnana sè apa-ropa..
Manyènadhi cajâ ngareḍḍhâp sè ngapèncotè atè bulâ bân dhika
Ḍu.... segghut sè’èrra bulâ neng-ngenneng ta’ pa oca’ sè ama’na
Ropana bâḍâ sè arontoan ḍâlem bhâsa sè terro bulâ krèna.